Nacín un caloroso 17 de agosto do ano 92. Aquel día miña nai vía como bailaba meu irmán maior e meu pai tiña un concerto co seu grupo, mais cando chegou xa tivo que marchar correndo para me dar a benvida.
Son de Vimianzo, do corazón da Costa da Morte. E alí está o meu corazón. Mais non enteiro, un anaquiño deixeino en Compostela, onde estudei filoloxía galega e onde pasei os mellores anos da miña vida.
Outro anaco pequeno vive na Coruña, a cidade da luz, onde me preparei para ser profesora de galego e onde hai pouco comecei o longo camiño das oposicións. Agardo así conseguir preparar a outros/as no futuro.